TR3

Experience:

Kaniadtong miaging Sabado, Noviembre 26, 2007, gibati nako ang kalipay sa akong paghimamat sa selda leader nga akong kanunay makauban sa pagduaw sa pipila ka bag-ong BEC selda didto sa Panalipan. Nalipay ko kay nagkita na usab mi ug siya mibalita nako sa mga kalambo-an sulod sa mga semana nga wala ako makahigayon sa pagduaw didtong dapita. Sa among pagpadayon sa among panagsultianay siya mipadayag sa iyang gibati niadtong Septembre 16 kanus-a dinhay usa ka salo-salo sa ilang balay diin usa ako sa nakatambong sanglit iya man usab akong gipaadto sa ilaha. Miingon siya nako nga wala gyud niya kapugngi nga mitulo ang iyang luha nga dinhay importanteng tawo nga wala makahigayon sa pag-adto sa ila kay dinhay laing tawo nga midapit. Sa pagpadayon sa among pag-estorya ako siyang giingnan nga basin kon dili gyud tuyo ang pagpakaubos sa ilang kahimtang ug ako mipahinumdom kaniya sa ka-importante usab sa akong pagtambong ug sa uban pang lumilihok sa ilang kapilya.

Social Analysis:

Dili gyud ko makabasol sa maong selda leader nga mobati og kaguol niadtong hitabo-a. Nangandam na man gyud sila ug nagdahom nga mo-adto gyud ang maong tawo sa ilang balay. Sa laing bahin dili usab ako makabasol nga napakyas pagtambong ang maong tawo. Wala man gud niya mahibaw-i kon unsa kasibot sa ilang pag-andam ug ang kahinam nga ilang gibati nga nagpa-abot sa iyang pag-adto. Dinhi akong na-amgohan kon unsa gyud diay ka-importante ang presensya nga ikapaambit ngadto sa ubang tawo dinha sa pagpangalagad sa Simbahan.

Theological Reflection:

Kinahanglan gyud ang presensya nga walay pagpinig sa kahimtang sa tawo. Bisan pa’g walay intensyon sa ubos nga pagtan-aw, apan ang gibati sa maong selda leader nagdala nako ngadto sa pagpamalandong sa presensya nga akong ikahatag ngadto sa uban. Tataw gyud dinha sa Ebanghelyo nga ang Ginoo migahin sa iyang panahon aron pagpakig-uban sa katawhan. Ug gani dili lang physical nga presensya ang Iyang gihatag, misaad pa gyud siya sa pagpakig-uban sa Iyang mga tinun-an hangtod sa katapusan sa panahon (Mat 28:20). Mao nga nanghina-ot ako sa akong kaugalingon nga makahatag og pagtagad ug pagpakig-uban sa uban sa walay pag-ila sa kahimtang o social status tinukmod sa paghigugma sa Dios ug sa isigkatawo.

Pastoral Action:

Mahinungdanon gyud kaayo nga dili pakyason ang mga gikasabutan nga kalihokan ma-meeting o ma-kombira man. Angay usab nga himoon ang pagpangumusta ug pagdu-aw sa kabalayan kay makahatag man kini og dugang pag-ila sa kamahinungdanon sa tawo.