A Homily on the Friday of the Fourth Week of Lent

Sanglit ania na man kita sa ika-upat nga semana sa kwaresma, ug hapit na man nato dumdumon ang Semana Santa, ingon niini na gyud kasagaran ang atong madungog nga tema diha sa ebanghelyo, sama sa atong nadungog nga gibasa karon. Nagkadako gyud ang tension tali ni Jesus ug sa mga autoridad sa mga Judiyo.

Si Jesucristo nakahibalo na nga ang mga Judiyo naglaraw pagpatay kaniya. Nahibalo usab siya nga aduna siyay misyon nga mas labaw pa kay sa pagkamatay. Tungod niini, nagsangyaw siya diha sa publiko bisan pa’g adunay hulga sa kamatayon. Gikinahanglan gyud ang kaisog sa pagbuhat sama sa gibuhat ni Jesus. Siya maisugong mibarog sa unsay iyang gituohan. Dili niya tugotan ang kahadlok nga maoy makababag sa pagtuman sa iyang misyon.

Kon atong sulayan pagpamalandong ang atong tagsa-tagsa ka kinabuhi, tingali adunay mga panghitabo diin kita nakasinati usab og tension tungod sa pagbarog nato sa kamatuoran. Bisan dinha sa atong katilingban aduna gayuy tension nga mahitabo kon ang usa ka grupo maoy gustong mopasulabi ug hikalimtan na lang ang uban nga mas may panginahanglan. Bisan usab dinhi sulod sa atong kaugalingon duna usay tension tali sa maayo ug dautan. Ug usahay kondili kanunay mao ra ba juy atong mapalabi ang dili maayo kay lisod usahay para nato ang pagbarog o pagsunod sa maayo.

Apan sayop gyud diay kon adto ta mopili sa dautan. Matud pa ni Propeta Isaias ang mga dautang tawo wala gyud mahibalo sa mga tinagoan sa Dios, wala gayod sila maglaum sa mga ganti sa usa ka kinabuhi nga balaan ug walay buling.

Karong panahona nga atong gisaulog ang kwaresma, gipahinumdoman kita pinaagi sa atong paghandum sa kinabuhi ni Jesus nga mibarog diha sa kamatuoran. Gidapit kita sa pagsunod ni Jesus. Dili kay kutob ra diha. Diha sa atong pagbarog sa kamatuoran ug sa unsay atong gituohan, kauban ug nahiusa kita ni Jesus bisan pa man adunay mga pag-antos. Mahimo ba ni nato?

Diha sa mga martir, makakaplag kita’g mga modelo nga mga tawo nga malig-ong mibarog sa unsay ilang gituohan. Andam sila ug buot sila nga mohalad sa ilang kaugalingon tungod ug alang sa ilang pagtuo. Andam ba usab kita? Kondili, unsa kahay hinungdan? Ang kahadlok ba? Wala gyud kitay angay nga kahadlokan. Diha sa salmo responsoryo atong nadungog nga “sa pagtuwaw sa matarong, nagpatalinghog kanila ang Ginoo ug sa tanan nilang mga kalisdanan giluwas niya sila.”

Dili gyud diay kita angay nga mahadlok sanglit naa man ang Ginoo nag-uban kanato. Magmadasigon unta kita kanunay diha sa atong pagbuhat subay sa atong pagtuo.