TR1

Experience

Kaniadtong Hulyo 19 sayo akong miadto sa kapilya may usa ka oras sa wala pa sugdi ang misa sa alas 6:00 sa hapon. Wala pa gyud kaayoy tawo didto. Nakahinabi ko ang usa ka babaye nga membro usab sa choir. Gipanagsulti-an namo ang mga butang mahitungod sa ilang mga opisyales. Akong nasayran nga bag-o pa lang diay silang nagpili og bag-ong mga opisyales. Nahisgutan usab namo ang ilang mga plano sa pagpalambo sa ilang kapilya, ug uban pa. Nagtuo ko sa sinugdanan nga usa siya ka katekista o kaha opisyal sa ilang kapilya, apan dili diay. Matod niya usa lang siya ka yano nga sakop. Nakita nako nga aktibo siya sa mga kalihokan ug tungod niini nakadayeg ako niya tungod sa iyang gipakitang kasibot.

Social Analysis

Diyutay lang gyud ang mga tawo nga dunay sama nga kinaiya sa babaye nga akong gikahinabi. Kasagaran nga makit-an nga mag-una sa mga kalihokan mao gyud ang mga opisyales. Tingali ang dili opisyal magpanagana kay wala man isangon kanila ang mga katungdanan o kaha dili lang yud sila gusto nga magpakabana sa mga kalihokan. Apan ang akong kasinatian naghatag og lahi nga panan-awon. Dili siya opisyal apan aktibo. Unsa kahay naka-aghat niya aron magpakabana? Wala gyud koy igong kasayuran nga makatubag sa akong pangutana. Pero igo na kaayo nga aduna siyay gipakita nga diyutayng panig-ingnan sa pagpakabana.

Theological Reflection

Sa akong pagpamalandong, akong nakita nga gikinahanglan gyud mga mahatagan og pagtagad ang kinaiya sa pagtabang sa mga kalihokan sa walay pagtagad kon tinukmod ba kini sa katungdan o dili. Ang mamahimo untang motibo mao ang matinud-anon ug kinasingkasing nga paglihok tinukmod sa paghigugma nga gikan sa Ginoo. Ang ato untang mga lihok tinukmod sa atong pagka-sumusunod ni Cristo. Mao kini ang kinabuhi nga giingon ni San Pablo nga dili na siya maoy nabuhi kondili si Cristo na maoy mipuyong buhi diha kaniya (cf. Gal 2:20).

Pastoral Action

Mao kini ang akong nakit-ang hagit sa pagpuyo diha sa katilingban. Kini mao ang pagpuyo nga si Cristo maoy makit-ang buhi diha atong inadlaw-adlaw pagkinabuhi. Busa kinahanglan nga maningkamot ko sa paghimo sa mga buluhaton nga dili tungod kay maoy tawag sa pagpangatungdanan kondili nagagikan sa paghigugma sa Ginoo ug sa isigkatawo.