TR 2

Experience

Adlaw kadtong Domingo. Kauban ako sa gamay nga katilingban nga naghimo og bible sharing o "Makalipang" didto sa kapilya. Usa sa mipaambit, usa ka babaye nga 23 anyos ang panuigon. Wala pa gani siya makasugod sa pagpaambit mitulo na dayon ang iyang luha. Gumikan diay kadto sa iyang kahimtang sa kaminyoon. Usa ka seaman ang iyang bana ug maoy nagpa-eskwela sa mga igsuon niini ug mga pag-umangkon. Siya isip asawa nagpuyo tipon sa gikanan ug mga igsuon sa iyang bana. Ang nakalisod sa iyang pagpuyo mao ang dili maayo nga pagtratar kaniya sa mga kadugo sa iyang bana. Mibati ako og kaluoy sa iyang kahimtang. Apan niadtong higayona igo lang ako sa pagpaminaw. Sa pagkataod-taod nakighinabi ako kaniya ginamit ang pipila ka punto nga akong nakat-onan sa kurso dinhi sa seminaryo bahin sa Sacrament of Marriage. Nakadayeg ako sa kaayo sa maong babaye tungod kay bisan pa sa dili maayo nga gibuhat ngadto kaniya wala siya mobalos og dautan hinuon nag-ampo siya alang sa ilang kaayohan.

Social Analysis

Usa gyud ka problema ang kahimtang sa maong babaye. Aduna gyuy depekto ang relasyon dinha sa sulod sa ilang pamilya karon. Maayo na lang gani kay adunay mga silingan nga motabang ug motambag kaniya bisan pag dili gyud lumad didtong dapita ang maong babaye. Sa laing bahin ako sa akong kaugalingon naglisod kon unsa ang akong ikasulti. Niadto pa gyud nga higayona ako nakasugat sa maong aktwal nga kahimtang. Tingali sayon ra kini sulbaron kon ang mga theory lang ang atong basihan. Apan dinha sa nahitabo-an mismo lisod gyud kini atubangon. Wala man gyud pud koy aktwal nga kasinati-an sa maong butang. Pero ang maong panghitabo baya nakadugang sa akong kahibalo. Ang kasinati-an sa maong mga tawo nga akong nasugatan naghatod nako ngadto sa kamimatngon sa akong kaugalingon nga kinahanglan ko nga motidlom o magpalawom dinha sa kasinati-an sa ubang tawo.

Theological Reflection

Bisan pa kon wala akoy giandam nang daan nga mga tubag sa ilang mga pangutana, ang labing mahinungdanon diay mao ang pagpakig-uban ug pagpaminaw kanila. Ug ang mga kasulbaran moabot ra unya sa panahon nga gitakda sa Ginoo. Kini nakapahinumdom nako sa duha ka butang diha sa Balaang Kasulatan:
Una, ang pagpakig-uban ni Jesus sa mga tawo. Ang Ginoo miuban gyud sa mga tawo ilabi na niadtong mga kabus ug mga nag-antos. Gani kita iyang gidapit aron sa pagpabilin diha kaniya. Iyang kining gihulagway sama sa punoan sa paras ug mga sanga. Nag-ingon ang Ginoo, "pabilin kamo kanako ug ako magpabilin diha kaninyo…" (Jn 15:4).
Ikaduha, kining maong suod nga relasyon sa Ginoo ug sa tawo dili gyud maguba kon dili mobiya ang tawo palayo sa Ginoo. Matod pa ni San Pablo, walay makapahimulag kanato sa gugma ni Cristo (cf. Rom 8:35-39).
Mao nga ako manghinaot ug mag-ampo nga aduna akoy ikatampo dinha sa pagsinati sa mga tawo sa presensya ni Cristo. Ug hinaut usab nga kini motubo dili lang dinha sa mga tawo kondili dinhi usab sa akong personal nga relasyon ngadto sa Ginoo.

Pastoral Action

Ang gikinahanglan gyud nga buhaton mao ang pagpakig-uban sa mga tawo diha sa Ginoo. Kini dili lang passive nga pakig-uban kondili aktibo gayud. Busa, kinahanglang andamon ug bansayon ko ang akong kaugalingon alang niining maong katakos.