IKAWALO NGA DOMINGO SA ORDINARYONG PANAHON (A)

Ang naghinubra nga pagpangita sa materyal nga mga butang mao kanunay nagtental sa mga tawo. 

Kadtong matental niini mawad-an sa ilang dignidad ug mamahimong ulipon sa mismong mga butang nga mao untay magsilbi kanila.  Kita nga nahimutang karon sa katilingban nga nagpasulabi sa pagkonsumo, kanunay gidani sa mga commercial nga nagpakusog sa pangandoy alang sa mga materyal nga butang.  Ang pipila kanato hilabihan ang pagpakabana sa mga materyal nga panginahanglan nga mahisama na kini og maoy atong tumong sa pagpakabuhi ning kalibutana.  Mao kini ang nagpadayong hagit sa atong pagtuo sa Ginoo nga nahigugma ug nag-atiman kanato ug sa atong mga panginahanglan.

Mipasidaan si Jesus kanato bahin niini: “Walay mahimong ulipon sa duha ka agalon… Dili kamo makapaulipon sa Dios ug sa salapi!” (Mat 6:24).  Alang kanatong tanan karon si Jesus miingon, “Ayaw kamo kabalaka…”  Ang iyang mga pulong dili aron paghimo nato nga magtinapulan ug mapasagaron apan usa kini ka pagdapit ngadto sa pagkamasaligon.  Usa kini ka pagsusi kon unsa man gyud ang hatagan nato sa hustong priority.  Kitang mga kristiyanos mag-atiman sa mga materyal nga panginahanglan alang sa atong kaugalingon ug sa atong isigkatawo, ilabina niadtong gitugyan ubos sa atong responsibilidad.  Gikinahanglan kini kay ang kalibutan gitugyan sa atong pag-atiman ug alang sa atong mga panginahanglan. 

Apan mipahinumdon si Jesus kanato nga atong ipahiluna ang pag-atiman sa atong mga panginahanglan subay sa panglantaw sa Gingharian sa Dios nga maoy labaw sa tanan natong mga paninguha.  Ang tanang butang maoy mga kahimanan sa pagtukod ug pagpalambo sa maong Gingharian.  Ang atong mga paningkamot alang sa atong panginahanglan atong isalig ngadto sa Amahan, diha sa kasiguroan nga Siya nga naghatag sa kinabuhi nag-atiman sa tanan niyang mga binuhat ug naghatag sa mga gikinahanglan.  Ang mga bersikulo 26 ngadto sa 29 sa Ebanghelyo karong Domingoha maoy matahom nga paghulagway sa pag-atiman sa Dios sa tanan niyang mga binuhat, bisan sa kamubo sa panahon sa ilang kinabuhi, ug bisan ubos lang ang ilang bili kay sa tawo.

Ang atong pagsalig ngadto sa Dios maoy magpalingkawas kanato sa mga kabalaka nga nakahasol sa kinabuhi sa mga walay pagtuo.  Ang pagsalig sa kamanggihatagon sa Ginoo maoy maghimo kanatong makapahimulos sa kagawasan isip Iyang mga anak.