TR 4

Experience

Kaniadtong miaging Sabado, Pebrero 9, 2008 tungod kay bisperas man sa pista sa Parokya mi-serve ‘mi sa misa. Unya, pagkahuman sa misa ug sa wala pa sugdi ang prosesyon nahimamat nako ang usa ka membro sa BEC selda, si Ate Tessie. Tungod kay pista man lagi mi-greet ko niya og happy fiesta. Malipayon usab siyang mitubag ug unya misugilon siya nga nagpadayon sila sa ilang makalipang matag biernes. Miingon siya nga si Nanay Gloria ang miuban nila sanglit bag-o pa man lang silang nagkapundok o na-organize. Nalipay ko sa maong balita tungod kay sa una pa nakong pagbisita didto ug pag-awhag nila nga magporma og BEC diyutay ra gyud ang makahigayon sa pagtambong. Adlaw man gud kadtong Sabado ug daghan kanila ang may nagkalainlain nga kakulian.

Social Analysis

Ngano kahang ang sitwasyon man sa ilang BEC ang gisugilon dayon ni Ate Tessie sa among panagkita? Tungod ba kaha kay ako ang nag-follow-up didto o gusto lang gyud niyang mahibalo ko sa ilang kalambo-an? Bisan unsa pa man ang iyang rason akong nakita ang iyang concern sa ilang gamayng katilingban. Tingali gusto niyang madasig ang iyang mga kauban sa pagsuporta sa ilang pundok. Nagkinahanglan pa gyud tingali sila og mo-agak nila, salamat na lang kay nagpadayon pag-uban nila si Nanay Gloria, ang lider sa ilang silingang selda.

Theological Reflection

Sa pagkatinuod nalipay ko sa maong balita. Morag duna na man gud akoy kadugtungan ngadto nila mao nga mobati usab ko kun unsa ang ilang dangatan. Apan dili na gyud ko maka-uban sa ilang makalipang sanglit sa lain man kining adlaw nila gihimo. Hinuon ako man silang gi-apil sa akong pag-ampo. Ug naka-amgo ko nga dili lang gyud diay kutob sa atong kaugalingong paningkamot ang tanan. Matod pa sa Ikaduhang Consilio Plenario sa Pilipinas, ang Espiritu Santo mao gyud ang maga-una, maga-uban ug magpabunga sa misyon sa Simbahan (PCP II, 214). Mao nga sa bisan unsa man nga kalambo-an diha sa mga paningkamot sa pagsangyaw ug pagpalambo sa Simbahan angayan lang nga timan-an sa kanunay ang kalabutan sa Espiritu Santo nga modasig natong tanan sa pagpadayon.

Pastoral Action

Bisan dili na ako makahigayon sa pag-apil sa ilang makalipang, maayo usab tingali nga ako silang duawon sa ilahang panimalay aron pagpangumusta. Kondili man gani kini mahimo pwede sab nga himamaton ko sila didto sa simbahan human sa misa sa Domingo.