DOMINGO SA SANTISIMA TRINIDAD (A)

 

Ang misteryo wala magpasabot nga wala kitay mahibaloan bahin niini. Hinuon, kita mahibalo sa usa ka butang, apan dili kita mahibalo sa tanan.  Ug ang labing dako ug labing lawom nga misteryo sa tanan mao ang atong gisaulog karong Domingoha, ang Misteryo sa Santisima Trinidad. Pinaagi ni Jesu-Cristo, nahibaluan nato kon unsa ang hitsura sa Dios.  Iyang gipadayag sa tanang katawhan nga ang Dios Usa ra, apan wala Siya mag-inusara, kay Siya usa ka komunidad sa Tulo ka Diosnong Personas (Divine Persons)– ang Amahan, ang Anak ug ang Espiritu Santo.

Ang Katesismo sa Simbahang Katoliko nagtudlo nga “pinaagi sa pagpadala sa iyang bugtong Anak ug sa Espiritu sa Gugma sa pag-abot sa kapuno sa panahon, ang Dios nagpadayag sa iyang kinahiladmang sekreto: Ang Dios mismo maoy walay kataposang pagbinayloay sa gugma, Amahan, Anak ug Espiritu Santo, ug siya mitakda kanato sa pag-ambit niana nga pagbinayloay” (no. 221). Busa, kini nga misteryo nagtudlo kanato kon kinsa gayod ang Dios. Ug sa samang higayon, atong mahibaloan ug madiskobrehan ang kamatuoran kon kinsa gayod kita. Si Papa San Juan Pablo II miingon: “Sa pakig-ambit sa grasya uban sa Trinidad, ang ‘lugar nga puy-anan’ sa tawo gipalapad ug gipataas ngadto sa labaw sa kinaiyahan nga lebel sa balaang kinabuhi. Ang tawo nagpuyo sa Dios ug pinaagi sa Dios.”

Dili nato hingpit nga masabtan kini nga kamatuoran, kay kini ang labing lawom ug dili matukib nga misteryo sa atong pagtuo. Apan sa gihapon ang Dios nagpadayag sa Iyang kinahiladman nga tinago kanato, dili aron sa paglibog kanato sa Iyang dili matukib nga misteryo, kondili sa pagdapit kanato sa pag-ambit sa Iyang kinasulorang Kinabuhi. Ang atong tahas, dili ang hingpit nga pagsabot niini nga misteryo, kay kana klaro nga imposible, apan ang pagsundog sa kinabuhi sa Balaan nga Komunidad sa Amahan, Anak ug Espiritu Santo. Dayon atong madiskobrehan ug masinati ang tibuok ug hingpit nga kalipay.

Unsa man gyud ang kinauyokan sa Misteryo sa Labing Balaan nga Trinidad? Ang Ebanghelyo karong Domingoha naghisgot bahin niini: Gugma. Ang Dios gugma. Kini mao ang hingpit nga gugma nga naghiusa sa tulo ka Balaang Persona, aron sila dili tulo, kondili Usa ka Dios. Ang tinuod nga gugma kanunay maghiusa. Ug kon kita magkinabuhi diha sa gugma, kita mahiusa sa usag usa, ug labaw sa tanan, mahiusa sa pamilya sa Dios – ang Amahan, ang Anak ug ang Espiritu Santo.

Usa ka magtiayon nagdali ngadto sa klinika sa usa ka dentista. “Doktor,” miingon ang babaye, “Gusto kong magpa-ibot sa ngipon. Nagdali mi. Busa, dili ka kinahanglan nga mogamit sa bisan unsang anesthesia. biraha lang ang ngipon sa labing madali.” Ang dentista natingala ug mipahayag sa iyang pagdayeg. “Oy, isog ka nga pagkababaye, madam,” siya miingon. “Karon, palihog sultihi ko kon asang ngipona kini?” Gibira sa babaye ang iyang bana sa iyang kilid ug miingon, "Darling, ablihi ang imong baba."

Sa pagkatinuod, dili kini ang gugma nga gisulti sa atong Ginoo. Usa ka mahinungdanong kinaiya sa gugma mao ang paghatag: “Kay gihigugma pag-ayo sa Dios ang kalibotan nga gihatag Niya ang Iyang bugtong Anak” (Jn 3:16). Ang paghatag dili sayon. Ug ang paghatag sa kaugalingon siguradong sakit ug tinuod nga lisud. Apan si Jesus naghatag kanato sa panig-ingnan pinaagi sa iyang pagsakripisyo sa kaugalingon didto sa krus: “Walay bisan kinsa nga may gugma nga molabaw pa niini, ang paghatag sa iyang kinabuhi alang sa iyang mga higala” (Jn 15:13). Kini nga matang sa paghatag - hingpit nga paghatag sa kaugalingon - nga nagdala sa lig-on nga panaghiusa. Ang paghatag ug pagpaambit makatukod ug lig-on nga mga pamilya ug komunidad.

Ang pagpangita alang sa kalampusan, salapi ug ambisyon nagdala sa mga tawo nga magpuyo nga maglain ug mag-inusara. Sa daghang mga nasud sa first world, ang mga bata gitudloan ug gidasig nga magkinabuhi nga independente ug makakat-on sa pag-atiman sa ilang kaugalingon sa bata pa. Daghang magtiayon ang nagpanuko sa pagpanganak kay nahadlok nga ang mga panginahanglanon sa pamilyahanong kinabuhi basin makaapekto sa ilang career ug mga plano alang sa malamposong kaugmaon. Ang mga tigulang gibutang sa mga nursing home tungod kay ang ilang mga anak nagkapuliki kaayo sa pagpangita og kwarta ug pagsaka sa social ladder. Dayag nga daghang mga tawo sa atong modernong katilingban walay kapilian gawas sa pagpuyo nga nag-inusara, ug sa ingon nahimong nagmingaw. Ang katingad-an nga mga gamit sa balay gidisenyo aron mahimo ang nag-inusara nga kinabuhi nga mas kombenyente ug maagwanta, aron "makapuyo ka nga nag-inusara nga wala mag-inusara."

Sa daghang mga nasod sa third world, ang kakabos mitultol sa daghang ginikanan sa pagbiya sa ilang mga pamilya aron mangitag maayong suweldo nga mga trabaho sa gawas sa nasod. Sa daghang mga kaso, kini mosangput sa pagluib sa kaminyoon, pagkabungkag sa pamilya ug pagkadaot sa emosyon sa mga bata, nga nagdugang sa gidaghanon sa nag-inusara ug nasamdan nga mga tawo sa kalibutan. Sa giingon sa tinagalog, “Aanhin pa ang damo kung patay na ang kabayo?” (Unsa man ang gamit sa kumpay kung patay na ang kabayo?)

Sa dato ug kabos, ang hinungdan sa kamingaw mao ang materyalismo ug kahakog. Sa diha nga ang mga tawo nalinga sa tinguha nga makabaton ug labaw pa, ang bili sa kaugalingon ug awtonomiya gibayaw, samtang ang bili sa paghatag ug pagpaambit mataligam-an. Apan unsa ang kahulogan sa kalampusan ug kabulahanan kon wala kitay ikapaambit kanila?

Sa Basahon sa Genesis, ang Dios miingon, “Dili maayo nga ang tawo mag-inusara” (Gen 2:18). Dili siya gusto nga kita mag-inusara. Mao nga ang Ikaduhang Persona, si Jesu-Cristo, nahimong tawo ug gipadayag kanato ang kinahiladmang tinagoan sa Dios. Ug siya nagdapit kanato sa pag-ambit sa walay kataposang kinabuhi ug gugma sa Dios. Ang bugtong paagi padulong sa lig-on nga panaghiusa ug malungtaron nga kalipay mao ang pagpahiuyon sa atong kinabuhi sa panig-ingnan sa Balaan nga Trinidad, pagpuyo sa atong mga pamilya ug komunidad sa usag usa ug makanunayon nga pagbinayloay sa gugma. Sa matag higayon nga kita manguros, atong ipahayag ang atong pagtuo sa Labing Balaan nga Trinidad, ug himoa kining kanunay nga usa ka pag-ampo nga kita mahimong buhi nga mga hulagway nga magsalamin sa gugma ug panaghiusa sa Amahan, ug sa Anak ug sa Espiritu Santo.