IKA-15 NGA DOMINGO SA ORDINARYONG PANAHON (A)

Nagpuyo na kita karon sa panahon sa telebisyon. Moangkon man kita o dili, ang atong panghunahuna, pamatasan ug paagi sa kinabuhi naimpluwensyahan niini. Daghan kanato, sa pagkatinuod, naghimo sa telebisyon dili lamang ingon nga tinubdan sa impormasyon, apan usab ingon nga sumbanan alang sa kinaiya sa tawo. Kung nagtan-aw ka sa TV, naglingkod lang ka sa sopa ug ang tanan - mga balita, kalingawan, ug mga komersyal - gihatud na nganha kanimo. Wala nay kinahanglan buhaton. Passive spectators ta. Ug kung dili ka ganahan sa show, usbon lang nimo ang channel o i-off lang nimo.

Subo nga palandongon nga daghan kanato ang ingon ra pod niini nga matang ang atong relasyon sa Dios. Gitratar nato Siya sama sa telebisyon. Maminaw kita sa pulong sa Dios, apan wala nato makita ang panginahanglan sa pagbuhat ug usa ka butang bahin niini. Nagpabilin kita nga pasibo ug walay labot nga mga tumatan-aw ug tigpaminaw. Labaw pa niana, naglaum kita nga kanunay makadungog ug makapalipay nga mga butang ug malingaw. Atong likayan nga makadungog sa lisud ug mapait nga mga kamatuoran sa Ebanghelyo. Ug kon dili nato makuha ang atong gusto o gipaabot, molakaw kita ug mangitag laing simbahan, o isalikway lang nato ang Dios sa atong kinabuhi.

Busa, niining mga panahona, nagkinahanglan ug mas epektibo ug mas maayong mga paagi sa pagsangyaw sa Ebanghelyo ni Kristo. Mao kini ang nagpalihok ni Pope Benedict XVI sa pagtukod sa Pontifical Council for the Promotion of New Evangelization (nga karon nahimo nang Dicastery for Evangelization). Miingon siya, “Ang pagmantala kang Jesukristo nga bugtong Manluluwas sa kalibutan ingon og mas komplikado karon kaysa kaniadto; apan ang atong tahas nagpabilin nga mao ra sa sinugdanan sa atong kasaysayan…Ang krisis nga nasinati nagdala sa kaugalingon nga mga timailhan sa pagbulag sa Dios gikan sa kinabuhi sa mga tawo, sa usa ka kinatibuk-ang pagkawalay pagtagad ngadto sa Kristohanong pagtuo mismo, ngadto sa punto sa pagsulay sa pagpahimulag niini gikan sa publiko nga kinabuhi.” (Address sa mga miyembro sa Pontifical Council for Promoting New Evangelization niadtong Mayo 30, 2011).

Karong Domingoha, ang Ebanghelyo naghisgot bahin sa pagsangyaw. Ang sambingay sa Magpupugas mahimong mas tukma nga tawgon nga Sambingay sa mga Binhi. Ang gipunting sa sambingay dili sa magpupugas kondili sa mga liso. Gikomparar ni Jesus ang pulong sa Dios sa mga liso nga gipugas sa lainlaing matang sa yuta. Motubo kini ug mamunga kon husto ang kondisyon ug disposisyon sa yuta. Gikan niini nga sambingay, kita makakuha og duha ka importante nga mga leksyon.

Una, ang pulong sa Dios motubo ug mamunga lamang kon kini itanom sa maayong yuta. Apan ang maayong yuta dili sulagma. Produkto kini sa kahago ug sakripisyo sa mag-uuma nga nag-ibot sa mga sagbot, nagdaro sa yuta, nagtikad ug nag-alima niini sa tubig, sustansya ug abono. Sa samang paagi, kon gusto nato nga ang pulong sa Dios motubo ug mamunga dinhi kanato, kinahanglang magkugi kita sa pagtangtang sa mga sala gikan sa atong mga kasingkasing, pag-ugmad sa atong kalag sa pagbuhat sa Kristohanong mga hiyas ug pag-amuma niini sa mga grasya sa Dios ug sa mga sakramento. Sa ato pa, mao kini ang gipahimangno ni San Pablo: “Padayon kamo sa pagpaningkamot uban sa kahadlok ug pagtahod aron sa paghingpit sa inyong kaluwasan (work out your salvation with fear and trembling)” (Fil 2:12).

Ikaduha, gipakasama ni Jesus ang pulong sa Dios sa usa ka liso. Kini mao ang paghatag og gibug-aton sa kamatuoran nga ang pulong sa Dios wala moabut kanato ingon nga usa ka nahuman nga produkto. Ang liso niini gitanom sa atong kalag, ug kinahanglan natong buhaton ang atong bahin sa pag-amuma niini ug sa pagpamunga niini. Mao kini ang rason nganong gihimo ni Jesus ang iyang ministeryo sulod lamang sa tulo ka tuig. Ug human niana, sa wala pa siya mobalik sa iyang langitnong Amahan, iyang gisugo ang iyang mga tinun-an, “sa inyong pagpanglakaw himoa nga akong mga tinun-an ang tanang katawhan sa tibuok kalibotan. Bunyagi sila sa ngalan sa Amahan, sa Anak ug sa Espiritu Santo 20ug tudloi sila pagtuman sa tanan nga akong gisugo kaninyo.” (Mt 28:19-20). Sa laktod, wala niya nahuman ang tanan. Gisugo niya ang tanan niyang mga sumusunod sa pagpadayon sa iyang nahimo. Iyang gitanom ang mga liso sa kaluwasan; anaa ra sa iyang mga sumusunod, inabagan sa Balaang Espiritu, sa pagpadayon ug paghuman sa trabaho.

Busa, sa dili pa kita mobiya sa Simbahan, ang pari nagsulti kanato, “Ang nahalad na ang Misa. Lakaw nga malinawon.” Sa iningles “The Mass is ended. Go in peace.” Dili gyud kini usa ka dismissal, apan usa ka commissioning. Kita gipadala sa usa ka misyon, aron ang pulong sa Dios mamunga sa atong adlaw-adlaw nga kinabuhi. Dili kini magpabilin nga static ug passive. Kini kinahanglan nga mamunga ug abunda nga mga bunga pinaagi sa atong mga kinabuhi nga natuhop sa mga mithi sa Ebanghelyo.

Busa pinaagi kang propeta Isaias, ang Dios miingon, “Kay sama nga ang ulan ug ang yelo mangahulog gikan sa langit, ug dili na mobalik didto kondili mopatubig hinuon sa yuta, aron manurok ang mga tanom niini ug kahatagag binhi ang magpupugas ug pagkaon ang mga tawo, ang akong mga pulong usab dili mobalik kanako nga kawang lamang; tumanon hinuon niini ang akong tuyo ug molampos gayod kini." (Is 55:10-11). para sa kaluwasan sa mga kalag ug sa tibuok kalibutan. Ang Dios nagpugas sa binhi. Ato nang turno sa pagpatubo niini ug pagpamunga alang sa kaluwasan sa mga kalag ug sa tibuok kalibutan. Ang Bag-ong Ebanghelisasyon nagsugod kanato.