IKA-17 NGA DOMINGO SA ORDINARYONG PANAHON (A)

Ang ebanghelyo karon naghatag kanato ug duha ka mugbong mga sambingay mahitungod sa gingharian sa langit. Ang una mao ang mahitungod sa usa ka tawo kinsa, human makakitag bahandi nga gilubong sa uma, nagbaligya sa tanan niyang nabatonan aron sa pagpalit sa uma ug sa pagpanag-iya sa bahandi. Ang ikaduha mao ang mahitungod sa usa ka magpapatigayon kinsa, human makakitag perlas nga mahal kaayo, gibaligya ang tanan niyang nabatonan aron mapalit ang bililhong perlas.

"Ang mga sambingay mao ang yutan-ong mga istorya nga adunay langitnon nga kahulugan." Unsa ang mga leksiyon nga angay natong makat-onan gikan sa mga sambingay nga bag-o lang natong gibasa?

Una sa tanan, dili kita angay maghunahuna nga ang mga sambingay naghangyo kanato sa pagpalit sa gingharian sa langit pinaagi sa atong salapi. Ang gingharian sa Dios bililhon ug gihatag nga walay bayad ngadto sa tanan nga makaplagan nga takus niini. Ang daotang tawo dili makasulod sa langit bisan kung naa niya ang tanan nga kuwarta sa kalibutan. Aron makasulod sa langit, ang usa ka tawo nagkinahanglan lamang sa bahandi sa iyang kasingkasing - sama sa kalumo, pagkamanggihatagon, kaaghop, ug kalooy.

Ang labing importante nga leksyon sa mga sambingay mao kini: ang gingharian sa Dios kinahanglan nga mag-una sa tanan natong mga prayoridad. Ang tawo nga gustong maadto sa langit o malipay sa kinabuhi uban sa Dios kinahanglang andam nga mawala ang tanan alang niini. Kon pilion nato ang Dios sa atong kinabuhi, kinahanglang andam tang buhian ang ubang mga bahandi nga atong gikalipayan. “Ang Dios mahimong puli sa tanang butang; apan walay makuha nga ikapuli sa Dios.” Ang gingharian sa Dios mas bililhon kay sa tanang bahandi sa kalibotan: “Kay unsa may kapuslanan sa usa ka tawo kon maangkon niya ang tibuok kalibotan, ug mawala ang iyang kaugalingong kalag?” Importante kini nga pahinumdom alang sa tanan tungod kay daghan kanato ang nasayop sa mga prayoridad sa kinabuhi.

 

Kung hatagan ta sa pagpili, unsa ang atong gusto: bulawan, himaya o Diyos (gold, glory or God)? Sayon ra para nato ang pag-ingon nga mas gipili nato ang "Dios" sa atong kinabuhi, apan ikasubo, dili kini ang atong makita sa mga prayoridad sa mga tawo karon. Kasagaran, ang tinguha alang sa bahandi ug kadungganan magduso sa mga tawo sa paggugol sa tanan nilang bililhong panahon alang sa trabaho ug negosyo. Ang nagpatigbabaw nga kultura nagsugyot nga aron magmalipayon, ang usa ka tawo kinahanglan nga adunay labaw pa ug makakab-ot og dugang pa (to have more and to achieve more), ug ang mga tawo lagmit nga motuo niini. Busa, daghan ang andam mosakripisyo sa ilang panahon alang sa pamilya aron makakuwarta. Daghan usab ang andam nga motugyan sa ilang Kristohanong mga prinsipyo ug values aron lang mahuptan ang ilang kabantog ug himaya.

Ang istorya ni Solomon kinahanglan nga makapadasig kanatong tanan. Sa usa ka damgo, ang Dios mitanyag nga ihatag kaniya ang usa ka butang nga iyang gusto. Kay batan-on pa, si Solomon makapangayo unta ug bahandi o himaya o taas nga kinabuhi. Apan kay nakaamgo sa dakong tahas nga nagpaabot kaniya, si Solomon mihukom nga ang gikinahanglan gayod niya mao ang kaalam sa pagmando sa iyang katawhan subay sa mga paagi sa Dios. Ang kaalam o inspirasyon sa Dios mao ang gipangayo ni Solomon. Ug ang Dios nahimuot pag-ayo kang Solomon ug Siya misaad kaniya labaw pa sa gasa sa kaalam, lakip ang bahandi, himaya ug taas nga kinabuhi. Husto ang kanta nga kanunay natong ganahan nga kantahon: “Pangitaa ninyo pag-una ang gingharian sa Dios ug ang iyang pagkamatarong, ug ang tanang maayong mga butang igadugang ra kaninyo.”

Si Mother Teresa sa Calcutta ug John Paul II parehong namatay nga walay gibilin nga properties, kay wala silay natigom nga mga bahandi sa yuta. Ilang nakaplagan ang ilang bahandi sa usa ka kinabuhi nga hingpit nga gihatag sa pag-alagad sa Dios ug sa Simbahan. Tinuod ang mga sambingay: Kadtong makadiskobre sa bahandi sa gingharian sa Dios malipay nga buhian ang tanan aron sundon ug maduol kang Jesus.